Chief Minister chuan, National Highway te thawmthat (repair) ngai a tam leh tawh a. Lirthei tana tlan harsa khawpa chhia a tam leh tawh hle. Contractor Liability Period chhunga mi vek an la nih angin rang taka thawmthat thuai a duh thu NHIDCL hotute hi a hrilh. 

Chief MInister chuan, Bypass Road kawng thar an laih hnua khaw chhung kawngpui, state PWD hnena an la hlan loh te a rang lama hlan tur te, Aizawl to Vairengte kawngpui chu ngaihpawimawh bik (priority) a nei tur tein a chah a. Central sorkara Rigid Pavement hmanga kawngpui sial tawh zawk tura a rawtna zirchiang tura hmalakna kalpui rang turin a chah bawk. Hemi thuah hian Union Minister Nitin Gadkari, MoRTH chuan Mizorama rigid pavement hmanga kawngpui sial chungchang lo zirchiang turin NHIDCL te hi a hrilh tawh a ni.

Thingfala Mamte ‘T’ Baptist Kohhran Biak in chim chungchang pawh Chief Minister hian a sawi chhuak a. NHIDCL hotute chuan Deputy Commissioner Office-in Assessment an neih tawh thu leh an Assessment chu Project Management Unit-ah an thehluh tawh thu an sawi a. Annin NHIDCL Headquarters lama an kaltir zel tur thu a tarlang.

Chief Minister-in hna hmanhmawhthlak leh ngaihpawimawh ngai bik a sawite chu Mizoram Regional Executive Director Adelbert Susngi chuan chak taka an bawhzui tur thu a sawi a ni.

NHIDCL lam hian an hnathawhna hmun hrang hranga harsatna an tawhte Chief Minister hnenah hian an thlen ve bawk a. State P&E Department nena hmalakho an mamawhna hmun te, ram neitu chiang lo chin fel la ngai te, Aizawl Eastern Side Bypass Road laih tura harsatna an tawh mek te, zangnadawmna lama harsatna an tawh hrang hrang te, mi thenkhatten kutthlak an phal loh vanga hna an thawh theih lohna hmun te leh chak zawka hna an thawh theih nana an mamawh dangte an tarlang a ni.